Description:

Is markte effektief? Met ander woorde, is aandeelpryse werklik net ‘n onvoorspelbare willekeurige loop, of is daar somtyds patrone wat herhaal of ander meer verklarende verskynsels in die daaglikse wisseling van aandeelpryse? Hierdie vraag is verwant aan die Effektiewe Mark Hipotese wat stel dat dit nie moontlik is om die opbrengs op ‘n bate te voorspel nie en alle relevante mark informasie is alreeds opgeneem in die huidige markprys (Shadbolt, J. Et al, p7). Indien daar wel winsgeleenthede is, kan pryse dan met ‘n redelike sekerheid voorspel word en watter tegniek sal hiervoor die beste wees? Is ekonometriese tegnieke van aanwins in die wetenskap, en kan dit miskien ‘n goeie integrasie bewerkstellig tussen die fundamentele- en die tegniese ontleding skole? Daar is dus ‘n behoefte om verskillende voorspel tegnieke met mekaar te vergelyk in hul vermoë om aandeelpryse te voorspel en dan die beste tegniek te identifiseer, hetsy dit ‘n ekonometriese tegniek is of nie.