La libro de la mil kaj unu noktoj (vol. 2)

La Libro de la Mil kaj Unu Noktoj estas ampleksa kolekto de rakontoj, kiuj venis al ni tra la jarcentoj. Danke al Antoine Galland, kiu tradukis kolekton de ĉi tiuj rakontoj en la francan komence de la 18-a jarcento kaj, tri jarcentojn poste, al Daniel Moirand, kiu esperantigis ilin, ankaŭ vi povos sperti tiujn mirindajn rakontojn, tiujn fabelojn kaj fablojn, tiujn rakontojn ene de rakontoj, kiuj transportos vin al diversaj orientaj landoj en diversaj epokoj, kiel ĉiunokte faris Ŝeherazad (Ŝahrzad) por veki la scivolemon de la sultano (ŝaho) kaj eskapi sian fatalan sorton. La tradukinto aldonis, komence de la libro, klarigojn pri la titolo de la libro, pri la traduko de la propraj nomoj kaj pri kelkaj specifaj terminoj. Li ankaŭ aldonis etan biografion de Antoine Galland kaj prezenton de la ĉefaj eldonoj de la 1001 noktoj. Said Baluĉi verkis la antaŭparolon. Entute estas 1600 pâgoj en 3 volumoj, ilustritaj per 430 desegnoj, kiuj venas de la eldono publikigita de Hachette (Parizo) en 1865. Ilin desegnis Gustave Doré, Castelli, Foulquier, Gustave Roux, F. Pierdon, ktp. La libro estas parto de la Serio Oriento-Okcidento de UEA, sub la numero 63.