Hayot karuseli (Carousel of Life)

БЎЖЕНА ЕЛЕНА МАЗУР-НЎВАҚ ҲАЁТ КАРУСЕЛИ Инглиз тилидан Раҳим КАРИМ таржимаси Шеърхонларга мактуб Бизни ёзишга нима ундаётганини бир неча сўз билан таърифлаш жуда қийин. Эсимни танибманки, шеърият ҳамиша менинг бир бўлагим бўлиб келган. Менинг оиламнинг уйи шеърга тўлганини эслайман: кўплаб китоблар, кўплаб қизиқарли одамлар. Онам ажойиб қўшиқчи ва раққоса эди. Дадам аккордеон чалиб, куйларди. Дадамнинг шеърлари ёзилган кундалиги ҳозиргача менда – Эмилига муҳаббат, унинг сўнгги муҳаббати ҳақидаги ажойиб шеърлар. Уларни “Видолашув кўпригида” деб номланган учинчи китобимда нашр эттирдим. Отам 2019-йилда оламдан ўтди ва кундалиги туфайли ҳозиргача шеъриятида яшаб келмоқда. Уйимиз том маънода китобларга ботиб кетган эди. Отам сўнгги тийинини ҳам китобга сарфлашга муваффақ бўлди. У менга ўқишни ва ўқиганларимни тушунишни ўргатди. Менинг бобом ва бувим, айниқса, икки бувим Мария ва Елена ўзларининг чексиз ҳикояларида менга оилавий сирларни етказишди. Мария бувим менга юрагим билан қарашни ва кечиришни ўргатди. Мен Галчинский, Тувим, Павликовский-Яснозевская каби ажойиб шоир ва шоиралар даврасида балоғатга етдим. Ҳаётимнинг оғир дамларида шеър олами, сирли дунём омон қолишимга ёрдам берди. Мен 2004 йилда Буюк Британияга кўчиб кетишга қарор қилдим. Ватанимда қашшоқлик ёқасида яшаб, ишлаш имкониятидан маҳрум бўлганим сабабли қабул қилинган бу қарор мен учун оғир эди. Aйниқса, Полшанинг Европа Иттифоқига қўшилиши натижасида яратилган дунёни кўрганимдан кейин. Болалигим юртига бўлган соғинч шеъриятимни мустаҳкамлади. Лекин асарларимни дунёга кўрсатиш учун бир неча йил керак бўлди. 2013-йилда инглиз тилида "Whispered" ("Шивирлайман") номли биринчи шеърлар тўпламим чиқди. Орадан бир йил ўтиб китобхонларга “Кўк соғинч” номли иккинчи шеърлар китобимни совға қилдим. 2014 ва 2015 йилларда роман ва бир нечта ҳикоялар тўпламини ёздим. Энди навбат “Умрим излари” номли янги шеърлар тўпламига. Интернет менга янги дўстлар орттириш ва янги одамлар билан танишиш учун кўп имкониятлар яратди. Бу тажриба алмашиш ва янги нарсаларни ўрганишга ёрдам беради. Натижада дунёнинг турли бурчакларидан яшовчи кўплаб ажойиб шоирларни учратдим. Сиз билан танишганимдан хурсандман, ўқувчиларим. Менинг шеърларим ўйларингизни ҳаяжонга солади, мулоҳаза уйғотади, қалбларда илиқлик қолдиради, деган умиддаман. Бўжена Ҳелена Мазур-Новак, полшалик шоира. [CODE-ART]