“Aishja r.a.: Ndriçimi i së Vërtetës rreth Moshës së Saj në Martesë – Një Qasje e Bazuar në Burime”

Parathënie Si autor, kam nderin t’ju prezantoj këtë vepër të re, “Aishja: Ndriçimi i së Vërtetës rreth Moshës së Saj në Martesë – Një Qasje e Bazuar në Burime”. Ky libër, merr përsipër të trajtojë, një temë tejet delikate dhe polemike, e cila, për fat të keq, është bërë shpesh objekt keqinterpretimesh dhe sulmesh ndaj figurës së Profetit tonë të dashur, Muhammed Mustafasë, dhe vetë fesë islame. Bëhet fjalë, për moshën e bashkëshortes së tij të nderuar, Aishes, në kohën e martesës. Para se të hyjmë në thellësi të debatit mbi moshën, është jetike të nderojmë dhe vlerësojmë pozitën e lartë të Aishes, në zemrat e muslimanëve dhe në historinë e Islamit. Ajo, nuk është thjesht një nga gratë e Profetit; por ajo është Nëna e Besimtarëve, një dritë e ndritshme në zemrën e Islamit. Siç thotë Kur’ani Famëlartë: “O gra të Profetit, ju nuk jeni si gratë e tjera, nëse keni frikë Allahun.” [Surja el-Ahzab, 32]. Profeti, vetë e dëshmoi superioritetin e saj, duke thënë, siç transmetohet nga Enesi: "Superioriteti i Aishes ndaj grave të tjera është si superioriteti i tharidit (lloj gjelle me mish dhe bukë) ndaj ushqimeve të tjera." [Sahih Buhari dhe Muslim]. Dëshmia e rëndësisë së saj, gjendet edhe në fjalët e sahabëve të nderuar, si Ebu Musa el-Esh'ariu, i cili pohonte: "Nëse ndonjë nga ne, shokët e Profetit, nuk e kuptonte ndonjë çështje, do t'i drejtoheshim Aishes dhe do të merrnim një përgjigje." Aishja  nuk ishte vetëm e dashura e Profetit, të cilën ai e thërriste me ëmbëlsi "Humejra" – "Trëndafil" apo "e ëmbla" – por, edhe një transmetuese e jashtëzakonshme e haditheve, duke na lënë një trashëgimi të çmuar prej mbi 2,210 transmetimesh. Dijetari i shquar, Urve ibn el-Zubeiri, e përshkroi me plot të drejtë: "Aishja ishte më e zgjuara nga të gjitha gratë dhe ajo, që i kuptonte më mirë gjërat". Dijetarët e mëdhenj islamë, si Imam Neveviu dhe Ibn Kajjim el-Xhevzijje, kanë lartësuar dijen, mençurinë dhe devotshmërinë e saj. Historianët, gjithashtu, e kanë njohur rolin e saj shumëplanësh dhe ndikimin e thellë në historinë islame, duke e konsideruar atë një figurë të fortë, të pavarur dhe me inteligjencë të lartë. Megjithatë, pika e polemikës, mosha e Aishes në kohën e martesës, ka shërbyer, shpesh, si një fushëbetejë, për kritikat ndaj Islamit. Në diskursin modern, kjo çështje shpesh përdoret, për të vënë në pikëpyetje moralitetin e Profetit , vlerat e Islamit, si dhe pozitën e gruas në traditën islame. etj....