كتير بنشوف مواقف قدامنا مش عارفين بدايتها ولا فاهمين حكايتها وتلاقينا افترضنا القصة اللي وراها واللي بسببها حصل اللي شايفينه قدامنا.. وأوقات تانية بنحكم على تصرفات ناس من شكلها ولبسها وممكن كمان من لونها وديانتها لمجرد إنه مش مقبول لينا كا أشخاص واقفين بتتفرج عليهم.. أحيانا بيحصل إن ربنا يسوقنا لأقدار نشوف أصل الحكاية اللي ورا الموقف والشخص وساعتها بنقول "معقول! ده الحكاية طلعت غير ما كنا فاكرين“ ولحظتها بس بنندم إننا ظلمنا شخص حكمنا عليه كل ذنبه إننا منعرفش حكايته ساعات كتير بنعمم الحكم على حاجات من وجهة نظرنا لمجرد تشابه عنوانها مع حاجات سمعنا عنها .. مع إن احتمالات الحياة عمرها ما كانت واحدة ودايما للحقيقة وجوه كتيرة وبنفس الفكرة قررت أعمل الكتاب ده... مجموعة قصص أبطالها ناس زينا ومننا شوفتهم في شوارعنا ومعرفش عنهم غير الصورة اللي أخدتهالهم وتخيلت منها حكايتهم اللي راعيت فيها إنسانيتهم .. وجيت أحكيهالكم عشان ممكن جدا تختلف عن الفكرة اللي خدتوها عنهم.. فا تعيشوا أفراحهم وأحزانهم وتحسوا بمشاعرهم.. واحنا بنشرب "قهوة عالسيرة".