Estrado-Sutro de Darmo-Trezoro de la Sesa Patriarko Huineng 六祖大师法宝坛经

La ĉina budhismo atingis la kulminon de sia prospero dum la dinastio Tang. La skolo de djano aŭ la ĉina zeno estas la plej disvastigita kaj plej influa skolo en budhismo. Ĝia efektiva fondinto estis Huineng (638—713). Li estis honore konsiderata kiel la Sesa Patriarko en Ĉinio. Liaj predikoj kaj vivhistorio estis registritaj de lia disĉiplo Fahai kaj poste formiĝis en la libron Estrado-Sutro de Darmo-Trezoro de Huineng. Ĝi estis la sola verko, kiu portas la nomon de “sutro” en la ĉina budhisma historio escepte de la predikoj de la Sinjoro Budho Ŝakjamunio. Tiu ĉi Estrado-Sutro de Huineng estas senlime valorega kiel por la Zenisma Skolo kaj, ĝenerale, por budhismo, tiel ankaŭ por la ĉina kulturo kaj por la homoj, kiuj estas vivintaj kaj vivantaj. Kune kun la konfuceismaj Kvar Libroj (t.e. La Granda Lernado, La Doktrino de la Ĝusta Mezo, La Analektoj de Konfuceo kaj La Libro de Mengzi) kaj la taŭismaj klasikaĵoj Laŭzio kaj Zhuangzio, ĝi brile lumigas la ĉinan kulturan historion. Tiuj ĉi klasikaĵoj donis grandan revelacion al la perfektiĝo kaj libera ekzistado de la ĉina popolo.