Nabayagen nga arapaap ngem ita la a malpas ti maikadua nga Antolohia ti BASNIW, ti TIMEK TI KAUNGGAN. Iti kangitingitan ti pandemia, nainaw daytoy a proyekto a pakalaglagipan kadagiti tugot ti lapis, ken tubbog ti panunot. Adu ti mayat a makipagmaymaysa iti daytoy a panggep ngem di kabaelan ti bulsa gapu iti nakaro nga angol ti biag iti agdama a panawen. Naglalaok ti tema dagitoy a dandaniw. Ngem maymaysa laeng ti panggep dagiti mannurat - ti mangipeksa kadagiti marikrikna, kadagiti paliiw ken kadagiti nalimes a pannakidangadang iti karit ti biag. Agsursuro kami nga agursurat. Sumursurotkami kadagiti mannurat. Ngem ketdi sapsapulen met dagiti mannaniw ken dagiti daniw iti bukodda a dalan. Agyamanak ti sibubukel a pamilia ti BASNIW iti patinayon a suportayo amin. Elmer Buduan Gamulo