LEMMA TI LAGIP

Ti 'Lemma ti Lagip' ti kinabaknangko no maipapan kadagiti padas ken paliiwko iti biag, agsipud ta ditoy ti nagpupuniponan dagiti pasamak nangruna kadagiti diak ninamnama a mapagteng kaniak. Lemma gapu ta saanen a mapugas iti panunot. Adda bukodda a panawen kaniak, iti kina ubing, iti kinaagtutubok ken iti kaaddan bikodko a pamilia. Lemma ti Lagip gapu ta dagitoy a lagip naaramid iti sabsabali a luglugar nga uray pay kadagiti kaaddak iti ballasiw taaw. Dagitoy a Lemma ti nangpatpatibker ken nangisuro kaniak no ania ti kinapudno a pasaren ti tao ken no ania ti pannakipaset iti biag ti sabsabali. Daytoy a Libro ket naurnong a dandaniwko. Saan man a makuna a de-kalidad dagitoy a gapuanak no maipapan iti literatura, ngem ketdi naipeksa ditoy dagiti mensahek iti komunidad, iti pamilia ken pakairamanan dagiti gagayyemko. Gapu ta naragsakak a tao, nakadidillaw nga adda angaw ken sutil dagiti sinangalko a balikas. Umanayen a ragsakko no adda mapaisemko a tao. Ammok ngamin a ti kapintasan a lemma a maipaayko ket ti lemma ti isem iti siasinoman a pakadanonan dagitoy a suratko.