Cociñamos na Escola

Acadar que os discentes gocen coa cociña, e sobre todo que teñan unha alimentación saudable, non é nada doado. Trátase dunha cuestión “práctica”, deixándolles que elaboren receitas sinxelas en acontecementos especiais no contorno escolar, como poden ser, as celebracións de aniversarios, festas de fin de curso…. A través da cociña, podemos incidir en calquera área do desenvolvemento e ao mesmo tempo sérvenos de estratexia que nos facilita a aprendizaxe do alumnado, pois axúdalles a levar unha dieta saudable, a comer variado, a aprender cores, a lembrar os pasos a seguir en cada unha das receitas, a estimular os sentidos do tacto, do gusto e do olfacto, así como a acadar infinidades de posibilidades instrutivas, pedagóxicas e tamén psicolóxicas. Con este libro de receitas de cociña pretendemos fomentar nos discentes, o carácter lúdico que supoñen as actividades propostas, e do mesmo xeito, que aprendan a aprender e a vivir dun xeito natural, sinxelo e coherente.