Мустақиллик ва тақдир туҳфаси туфайли Америкага келиб яшаш, ишлаш насиб этди. Оллоҳга шукр! Бу ёқларга биздан бир аср аввал келган юртдошлар билан кўришишга муяссар бўлаётганимиз эса нур устига аъло нур бўлмоқда. Уларнинг ҳар бири-бир дунё, ҳар қайсисининг ўз мураккаб кечмиши, мукаммал тарихи бор. Уларни бўямасдан-бежамасдан акс эттириш бугунги куннинг тақозоси. Зеро кечаги кунларни теран билиш бугунги авлод учун жуда муҳим аҳамиятга эга. Зеро донолар дейдиларки, биз ўтган кунлар мазмунини қанчалик яхши билсак, келажак сари ташлайдиган қадамларимиз, олға интилишимиз шунчалик дадил ва ишончли бўлади.