ማሕበር የሕዋት ኣግኣዝያን (ማየኣ) ስቪካዊ ሃገራዊ ምንቅስቓስ ናይ ህዝቢ ትግርኛ ኢዩ። ኣብ 2011 ኣብ ውሽጢ ኣስመራ ብሕቡእ ተመስሪቱ፡ ኣብ 2016 ድማ ብወግዒ ናብ ህዝቢ ቀሪቡ። ምስ ኣዝዮም ብዙሓት ምዝጉባትን ዘይምዝጉባትን ኣባላት ኣብ ወጻኢ ሃገራት ኮምኡ ውን ኣብ ውሽጢ ኤርትራ ዝርከቡ ሕቡኣት ኣባላት (ማየኣ) ኣብ መንጎ ህዝቢ ትግርኛ ልዑል ተቐባልነት ተጎናጺፉ ኣሎ። እዚ ምንቅስቓስ ኣብ ብዙሓት ከተማታት ኤውሮጳ፡ ኣመሪካን ኣፍሪቃን ኣብያተ ጽሕፈት ኣለዉዎ። እቲ ቀዳማይ ዕላማና ንኤርትራ ወግዓዊት ሃገረ መንግስቲ ህዝቢ ትግርኛ ብምግባር፡ ናይ ኩሎም ቀቢላታትን ሰበኽ ሳግም ዉሕዳንን ዲሞክራስያዊ መሰላት ብምኽባርን ባህላዊ መንነታቶም ኣፍልጦ ብምሃብን ኢንዳስትራልያውነት፡ ከተማውነትን ኣሃዛውነትን ምህናጽ ኢዩ። ቀንዲ ዕላማ ምንቅስቓስ ኣግኣዝያን ንኤርትራ ስትራተጂካዊ ኣገዳስነታን ዝምድንኣን ክብ ምባልን ውሑስ ዝኾነ ናይ ፋይናንስ፡ ዕዳጋን ቴክኖሎጂን ዝምድና ምፍጣርን፣ ካብ ኤውሮጳ፡ ኣሜሪካን እስራኤልን ልዑል ናይ ምሕደራ ዓቅሚ ሰብ ብምርካብን፣ ንገማግም ቀይሕ ባሕሪ ብልዑል ፍጥነት ኢንዳስትራልያዊ ምግባር፡ ምግሃድ ቁጠባዊ ዕብየት፡ ምፍጣር ስራሕን ምብልጻግን ኢዩ።