Moikom Zeqo Centauri i Poezisë Moderne

Në këtë libër mblodha shkrimet e mia mbi kozmologjinë poetike të poetit Moikom Zeqo, të shkruara gjatë këtyre dy viteve të fundit.Nga shkrimtarët tanë të ditëve tona është në avangardë poeti ynë Moikom Zeqo. Krijimtaria e tij ka sjellë një risi të paparë në poezinë tonë. Risija e tij ka të bëjë me procesin e perceptimit dhe të mishërimit konceptual të realitetit dhe me “rimagnetizimin” e figurave artistike, të metaforës dhe të alegorisë. Ai arrin të krijojë figura të plota dhe të pandara midis subjektit dhe objektit, midis tokësores dhe universales, duke arritur një pasqyrim kompleks të përmbajtjes së procesit të mendimit dhe po aq të stërholluar të perceptimit artistik.