Y "Anac Ning Arenas" bait ya Arenas, Arayat. Pampito reng palipi ri Tininti Bino at Apung Aning.
Ketang panaun ning keyang kayanakan, ilig na ing magbabagwa ampong manatsang tandang manuk kareng bulus-bulus.
Kabalyo na la ampong kateksing "Anac Arenas" di Sisu, Basit, Butotoy, Palau, Bongbong, Bayani, Alex, Sanu, at aliwa pang makialung keng kasiping-siping bale, kabang pula-pulai ya pang alang salol.
Minuna yang mika-ilig kareng poesia ketang magaral ya pang elementary, kapanaunan da keng Radyu di Poeta Jose M Gallardo ning Candaba, ampon y Poeta Bernardino Muldong ning Sta. Ana. Istung Crissotan neng aldo Jueves, makirandam lang Apung Bino keng DZAB, istasyun radio keng Balibago, Angeles City. Dapot meg-umpisa ya pang sinulat poesiang Capampangan ketang petsa 2006, inyang linikas ne keng Capampangan ing "Mi Ultimo Adios" nang Gat Jose P Rizal. Tikyan na niti ing pamanyulat na keng "Corido Ning Arenas", ing kuwentu ning baryu at deng memaryu ning Barrio Arenas.
Mipalimbag ya ing mumuna nang librung Capampangan a "Ding Mialiwang Obra" para keng Dep-Ed ketang banuang 2011. Pepalimbag ne ning Pampanga Language Council ketang 2011, keng saup ning FB Group a "Kapampangan Pride" (pemuntukan nang San Fernando Kagawad Anjie Hizon), ing librung pang-anak a linikas nang Anac Arenas keng Capampangan, "Ing Asu at ing Alino" at mipamie kareng anak a magaral elementaryang pam-publiku.
