METAKARDIOLOGIYA

Yurak — inson tanasining mo‘jizaviy a’zosidir. U tug‘ilgan onimizdan boshlab, hayotimizning so‘nggi lahzasigacha bir soniya ham to‘xtamasdan faoliyat yuritadi. Yurak va qon-tomir tizimi nafaqat inson tanasining barcha a’zolarini hayotbaxsh qon bilan ta’minlaydi, balki butun organizmning hayotiy muvozanatini saqlashda markaziy o‘rin tutadi. Aynan shu sababdan yurak sog‘lig‘i — inson salomatligining bosh mezoni va uzoq umr ko‘rishning asosi hisoblanadi. Bugungi kunda yurak va qon-tomir kasalliklari butun dunyo bo‘ylab o‘limning yetakchi sababi bo‘lib qolmoqda. Jahon sog‘liqni saqlash tashkilotining ma’lumotlariga ko‘ra, yurak kasalliklari tufayli vafot etganlarning soni yildan-yilga oshib bormoqda. O‘zbekiston Respublikasida ham ushbu tendensiya sezilarli bo‘lib, yurak-qon tomir tizimi kasalliklari umumiy o‘lim ko‘rsatkichining 50 foizidan ortig‘ini tashkil etadi. Shu bois bu boradagi chuqur va keng qamrovli bilimlarni jamlash, diagnostika va davolashda zamonaviy yutuqlardan xabardor bo‘lish har bir tibbiyot xodimi uchun zaruratdir. Ushbu "MetaKardiologiya" nomli kitob aynan shu maqsadda yaratilgan. Kitob kardiologiya fanining asoslarini — yurak va qon-tomir tizimining anatomiyasi, fiziologiyasi, patologiyasi, klinik ko‘rinishlari, diagnostikasi va eng zamonaviy davolash usullarini mukammal va tizimli tarzda yoritadi. Har bir bo‘limda nafaqat nazariy bilimlar, balki amaliy jihatlar ham chuqur ochib beriladi. Ayniqsa, bugungi kunda kardiologiyada joriy etilayotgan innovatsion texnologiyalar — farmakologik yangiliklar, intervensiya va minimal invaziv muolajalar, zamonaviy diagnostika usullari batafsil bayon qilinadi. Kitob kardiologiya sohasi bo‘yicha bilimini mustahkamlashni istagan tibbiyot talabalariga, amaliyotchi shifokorlarga va ilmiy izlanish olib borayotgan mutaxassislarga mo‘ljallangan bo‘lib, o‘quv va klinik faoliyatda foydali qo‘llanma bo‘lib xizmat qiladi. Shuningdek, yurak salomatligiga qiziqqan keng jamoatchilik ham undan zaruriy ma’lumotlarni topadi.