Arjana Fetahu Gaba përfaqëson një nga ato zëra poetikë që nuk ndërtohen me ngut, por rriten ngadalë, në përplasjen mes kujtesës, mallit dhe përvojës së jetës. Poetja shqiptaro-amerikane, me rrënjë çame, ka lindur më 1 janar 1977 në qytetin e Fierit, aty ku fëmijëria dhe vitet e para të ndjeshmërisë poetike u ushqyen nga një realitet i thjeshtë, por i mbushur me ngarkesë emocionale dhe shpirtërore. Që herët, fjala u shfaq tek ajo si nevojë, jo si zbukurim. Në vitin 1993, ende shumë e re, Arjana u vlerësua me një çmim ndërkombëtar nga Bashkia e Brindizit në Itali, në një konkurs kombëtar – një ogur i qartë se poezia e saj kishte tashmë një rezonancë që kapërcente kufijtë. Emigrimi drejt Shteteve të Bashkuara në vitin 1996, në New Jersey, nuk e ndërpreu këtë rrugë; përkundrazi, i dha një dimension të ri: dimensionin e mërgimit, të dyzimit identitar dhe të dialogut të vazhdueshëm mes vendlindjes dhe atdheut të ri.