APROS TI BALIKAS

Ni Rosemarie Utrera Unini, 43, ket naipasngay idi Mayo 29, 1978 idiay Bungro, Magsingal, Ilocos Sur. Isu ti maikadua kadagiti walo nga annak da Pablo C Unini ken Edna Utrera Unini. Maysa a single parent. Ni Marnnie U. Espiritu, 13, ti kakaisuna a prinsesa iti biagna. Simple ken managayat a babai ni Rosemarie. Mannakigayyem ken mannakiangaw. Naayat nga agbasbasa iti daniw a maipaspaskil kadagiti nadumaduma a grupo ti mannurat iti Facebook. Admin isuna iti Agbiag Ti Ilokano ken aktibo a kameng ti Basniw. Gapu iti adu a padpadasna iti biag, pinadasna ti nagsurat nupay makuna a di pay agbalikas a daniw tapno maipeksana laeng dagiti rikriknaenna. Inaramatna ti oras a panaginanana nga ikur-it dagiti makitkita, masuksukisok ken kapampanunotanna a tignay ti tattao ken ti komunidad. Dina impagarup nga iti maysa nga aldaw mailibrona gayam dagiti sinurnuratna. Inkarina a sayaatenna ti agsursuro tapno agbalikasto a daniw dagiti gapuananna. Kas kinunana, "Nagbalinen a paset ti angesko ti simple a panagsurat, gapuna agsuratakto latta inggana iti kabaelak." Daytoy ni Rosemarie. Maysa a gagangay a babai. Natibker nga ina. Makigubgubal iti rigat ngem natibker ti pammatina.